မျိုးချစ်သူ / ၀၈ စက်တင်ဘာ ၂၀၁၀
ယမန်နေ့က မီးသင်္ဂြိုဟ်ခဲ့သော လူငယ် (၂) ဦး အသုဘအပြီးတွင် ပဲခူးမြို့၌ လုံခြုံရေးတင်းကျပ်နေဆဲဖြစ်ကြောင်း ပဲခူးမြို့ခံတို့ထံမှ သိရသည်။
“ဆူဆူပူပူတွေဖြစ်မှာကို စိုးတယ်။ ကျနော်တို့အနေနဲ့တော့ ပြည်သူတွေ ထိတ်လန့်အောင် လုပ်တာမဟုတ်ပါဘူး။ မဖြစ်သင့်တာတွေ ထပ်မဖြစ်အောင် အထက်ကအမိန့်အရ လုံခြုံရေးကို ယူထားတဲ့သဘောပါ” ဟု ပဲခူး အမှတ် (၂) ရဲစခန်းတာဝန်ကျ ရဲအရာရှိတဦးက ပြောသည်။
မြို့တွင်း (၅) နေရာခန့်တွင် လုံခြုံရေးများ ချထားကြောင်း ပဲခူးမြို့ခံတဦးက ပြောသည်။
“ပဲခူးရွှေမောဓော၊ ပြီးတော့ အဝေးပြေးဂိတ်အနား၊ ပြီးတော့ ဇိုင်းဂနိုင်းရပ်ကွက်အနားက ရေနံ့သာဘုန်းတော်ကြီးကျောင်းအနီး၊ ပြီးတော့ ဈေးအနားနဲ့ ဆေးရုံအနားမှာ လုံခြုံရေးရဲကားတွေ ချထားတာ တွေ့တယ်” ဟု ၎င်းက ပြောသည်။
လုံခြုံရေးကားများတွင် ရဲများက ၀တ်စုံပြည့်ဖြင့် သေနတ်များကိုင်ဆောင်ကာ အသင့်အနေအထား ပုံစံရှိနေကြောင်း မျက်မြင်တဦးက ပြောသည်။
“လုံခြုံရေးက ချထားတာ ကောင်လေးတွေသေတဲ့နေ့ စက်တင်ဘာ (၅) ရက်နေ့ ညနေကပဲချတာ။ သင်္ဂြိုဟ်တဲ့နေ့မှာက ပိုများတယ်လေ။ မြို့ကလူတွေက မကျေနပ်ကြဘူး။ ဆန္ဒပြပွဲတွေဖြစ်မှာတောင် ကျမတို့က ကြောက်နေကြတာ။ အေးဆေးပဲ အသုဘပြီးသွားတယ်။ ဒါပေမယ့် အသုဘလည်းပြီးရော အခုရဲတွေက စောင့်နေတာတွေ့ရတော့ နဂိုကမှ စစ်သား၊ ရဲဆိုရင် မုန်းနေရတဲ့အထဲ ကြည့်လို့မရကြဘူးပေါ့” ဟု ပဲခူးဈေးကြီးအနီး နေသူတဦးက ပြောသည်။
ပဲခူးမြို့ ဇိုင်းဂနိုင်း (တောင်) ရပ်ကွက်၊ မြလမ်းတွင် နေထိုင်သူ မောင်စိုးပိုင်ဇော် အသက် (၁၉) နှစ်နှင့် မင်္ဂလာလမ်းတွင် နေထိုင်သူ မောင်အောင်သူဟိန်း အသက် (၂၃) နှစ်တို့နှင့် ခြေလျင်တပ်ရင်းအမှတ် (၅၉) မှ အရာရှိဖြစ်သူတို့ ခိုက်ရန်ဖြစ်ပွားခဲ့ပြီးနောက် ထိုစစ်တပ်မှ စစ်သားက စက်တင်ဘာ (၅) ရက်၌ သေနတ်ဖြင့်ပစ်ခတ်ခဲ့သဖြင့် အဆိုပါလူငယ် (၂) ဦး နေရာတွင်ပင် ပွဲချင်းပြီး သေဆုံးခဲ့သည်။
ယင်းသို့ သေဆုံးခဲ့သည့် လူငယ် (၂) ဦး၏ အလောင်းများကို ယမန်နေ့ နေ့လယ် (၁၂) နာရီတွင် ပဲခူးမြို့ ဆင်ဖြူကွင်း သုသာန်တွင် မီးသင်္ဂြိုဟ်ခဲ့ရာ လူပေါင်း (၂,၅၀၀) ခန့် လိုက်ပါပို့ဆောင်ခဲ့သည်။
ယခုအခါ ပဲခူးမြို့တွင် လုံခြုံရေးချထားသော်လည်း ပြည်သူတို့ သွားလာရေးကို ထိခိုက်မှုမရှိကြောင်း၊ မော်တော်ယာဉ်များ၊ အနှေးယာဉ်များ ပုံမှန်သွားလာနေကြကြောင်း မြို့ခံများက ပြောပြသည်။
Subscribe to:
Post Comments (Atom)
+Post+Card+1+(final).jpg)
+Post+Card+2+(final).jpg)
No comments:
Post a Comment